En Ribeira o Concello renova o alumeado das rúas de Lugo e Rosalía de Castro

O Concello de Ribeira informa da execución dos traballos para renovar as luminarias das rúas de Lugo e Rosalía de Castro en Ribeira: unha intervención que está sendo realizada por Instalaciones Eléctricas Coruñesas, S.L, cun investimento de 10.725 euros.

A intención desta intervención reside en “mellorar a iluminación nestas dúas vías substituíndo as luminarias actuais por outras de maior eficiencia acordes co seu carácter preferentemente peonil”, explicaron fontes do Concello.

Trátase de 4 novas luminarias na rúa Lugo e 24 de Rosalía de Castro, todas elas cunha cualificación enerxética A, que é “a de maior eficiencia segundo a gradación existente”, engadiu o Concello.

A actuación enmárcase no Plan Provincial de Cooperación ás Obras e Servizos de Competencia Municipal (Plan Único de Concellos) POS+ adicional 2/2020.