O Concello de Boiro está a levar a cabo as obras de reparación no carril bici do paseo marítimo de Barraña. A actuación englóbase dentro dun proxecto para o mantemento e arranxo de beirarrúas e pavimentos no termo municipal, que se están a executar con cargo ao Plan Único (POS) da Deputación da Coruña.
A actuación, dun importe de 20.109,39 euros, comprende a reparación de varios treitos deteriorados nun treito de 1.5 quilómetros de lonxitude do carril bici que recorre o devandito areal. En total vanse poñer a punto un total de 230 metros cadrados de pavimento de formigón, que na actualidade presenta deficiencias debido ao paso do tempo, para o que se vai realizar unha demolición previa e a execución dunha nova soleira antideslizante e marcas viarias.
O proxecto de reparación e mellora de beirarrúas contempla outras actuacións en diversos puntos do termo municipal como son a pavimentación na rúa Nova, nunha rúa lateral na avenida de Barraña, no rueiro na praza do Lorcho en Cabo de Cruz, na Lagoa; a dotación de beirarrúas dende o Coído ata a Changuiña; melloras nos accesos do CEIP Escarabote e no CEIP Abanqueiro; ou a dotación dun camiño entre o río Breiro ata A Boliña.
Todas estas actuacións, por un importe total de 164.074,38 euros, vanse executar con cargo ao Plan Único Concellos da Deputación da Coruña.
