Dodro convoca axudas para a escolaridade do alumnado e para a adquisición de material informático

O Concello de Dodro convocou dúas liñas de axudas para as familias. Trátase, por unha banda, dunha liña de apoios para a escolaridade con vistas ao curso 2021-2022 e, pola outra, dunha contía reservada para a adquisición de equipos informáticos e medios dixitais, orientada esta última a favorecer a integración tecnolóxico-docente das familias nun contexto, o actual, no que resulta máis imprescindíbel ca nunca esa integración.

Respecto das persoas destinatarias das axudas á escolaridade, será o alumnado do segundo ciclo de Educación Infantil e de Educación Primaria e Secundaria Obrigatoria durante o actual curso escolar, pertencentes a unidades familiares empadroadas en Dodro. Subvencionarase a adquisición de material escolar (todo tipo de material agás libros de texto xa subvencionados ou de préstamo) incluíndo gastos de actividades extraescolares e vestiario deportivo. Achegaranse oitenta euros a cada familia beneficiada.

No que atinxe ás axudas para o material informático, vai destinada a nenas e nenos de Primaria, ESO e de calquera dos niveis e modalidades de FP e Bacharelato. Inclúense a compara de portátiles, computadores de sobremesa, tabletas e dispositivos adicionais (USB, memoria externa, impresora, auriculares, etc). O importe será de 250 euros, financiado a través dos fondos da Deputación.

O prazo para solicitar ambas axudas estará aberto até o día 9 de decembro, incluído.