O Concello de Boiro celebrou na mañá deste 25 de novembro, Día Internacional para a Loita contra a Violencia de Xénero, unha concentración diante do Consistorio na que participaron as e os integrantes da Corporación municipal, alumnado e profesorado dos centros educativos locais e membros de varias entidades sociais con presenza no municipio e na nosa comarca.
Na cita, na que se leron poemas da escritora local Charo Lopes e da coruñesa Lucía Aldao, estiveron presentes o alcalde, José Ramón Romero, a concelleira de Feminismo e Igualdade, Dores Torrado, o deputado provincial, Blas García, e outros membros da Corporación local.
A lectura de poemas realizárona representantes da Asociación Ambar, a Asociación Amicos, Cruz Vermella, o Centro de Día de Boiro e alumnado do municipio. Á concentración sumouse tamén a Asociación Boirense de Empresarios, persoal municipal e veciñanza.
Máis actividades
A concelleira de Feminismo e Igualdade explicou que dende o Concello estase a traballar durante todo o ano en actividades e accións que teñen como obxectivo loitar contra a violencia machista. Este mes, salientou, programáronse unha serie de charlas englobadas dentro do ciclo Muller e saúde, uns faladoiros gratuítos sobre saúde vinculada á cuestión de xénero. Sen ir máis lonxe, este venres 26 de novembro abordarase a temática sobre habilidades de manexo de estrés, impartida por Patricia Porrúa Monterroso, psicóloga sanitaria, a partir das 16.30 horas no Centro Social de Boiro.
Participación en De Fronte
O Concello de Boiro, co obxectivo de dar visibilidade á violencia exercida contra as mulleres, participa nas campañas De Fronte contra a violencia de xénero, que impulsa a área de Igualdade da Deputación da Coruña e En Negro contra as violencias, unha acción colectiva de sensibilización social contra as violencias machistas. Durante estes días pode visitarse tamén no Centro Social de Boiro a mostra permanente Mulleres Senlleiras e, no me de febreiro, expoñerase Nós somos elas unha mostra da Deputación da Coruña.
