Amicos clausurou as actividades do seu Programa Integrado de Emprego 2020 – 2021

A Asociación Amicos clausurou este 3 de novembro en Ribeira as actividades do seu Programa Integrado de Emprego (PIE) 2020 -2021. Asistiron a acto celebrado no Auditorio Municipal ribeirense Judit Fontela Baró, xefa territorial de Emprego e Igualdade, Manuel Ruiz, alcalde de Ribeira, Digna Iglesias, vicepresidenta de Amicos, e Xoán España, director xeral de Amicos, amais de diversos representantes das empresas colaboradoras, entre os que se atopaba Elena Garrido, directora de Recursos Humanos do grupo JEALSA, e participantes no PIE. No acto púxose de manifesto “o gran labor que realiza a organización comarcal Amicos na sociedade, sobre todo, en canto a creación de igualdade de oportunidades e inserción laboral”.

Judit Fontela Baró quixo pór en valor a importancia de mostrar as experiencias vividas, “pois son o reflexo real do programa”, e agradeceu a Amicos o seu traballo. Tamén fixo referencia ao “compromiso, ilusión e implicación do alumnado, as empresas, as entidades e os concellos” que axudan a que o PIE sexa posíbel.

Na cita participaron a maiores as alumnas participantes, que recibiron unha acreditación polo agradecemento e o interese mostrado dende que se iniciou o PIE en novembro de 2020 e tiveron a oportunidade de contar as súas experiencias, tanto do punto de vista das estudantes, como das entidades participantes. Entre as alumnas atopábase Nerea Ajeitos Martínez, que foi a representante das súas compañeiras presentando o acto, amais de Mariám García del Río e Maria del Carmen Vara, que relataron as sensacións que viviron durante o curso.

Elena Garrido, pola súa banda, denominou a entidade Amicos como “compañeira de viaxe” e salientou a importancia de crear “emprego de calidade para que as persoas atopen un lugar onde se poidan desenvolver persoal e profesionalmente”.

122 mulleres participantes

No PIE do último ano, 122 mulleres participaron nas accións de formación e orientación. Entre as beneficiarias, hai 27 mulleres con discapacidade, 31 mulleres son menores de 30 anos con baixa cualificación e 14 mulleres están en situación de risco de exclusión social. A duración total en horas da formación impartida foi de 1.929 horas, segundo informou Amicos, engadindo que o obxectivo do proxecto é mellorar a ocupabilidade e a inserción laboral de persoas en situación de desemprego. Gracias ao PIE, 66 mulleres participantes no programa encóntranse traballando na actualidade e 39 de elas xa cumpriron tres meses desenvolvendo as súas funcións nunha empresa.

O Programa Integrado de Emprego 2020-2021 dividiuse en formación transversal en habilidades de comunicación, traballo en equipo e actitudes positivas para o emprego; formación complementaria para a manipulación de alimentos, prevención de riscos laborais, inglés e formación en novas tecnoloxías; e formación para o emprego, como por exemplo o Certificado de Profesionalidade de Atención Sociosanitaria en Institucións Sociais, o Certificado de Profesionalidade de Operacións Básicas de Restaurante e Bar, ou a Formación como Auxiliar de Sección de Produtos Frescos.

O proxecto foi posíbel gracias ao financiamento da Xunta de Galicia, o Servicio Público de Emprego Estatal, o Ministerio de Traballo, Migracións e Seguridade Social.