Outes reforzará o persoal do Punto de Atención á Infancia

 O traslado do centro ao colexio vello do Cruceiro está previsto para o vindeiro curso Outes, 23 de Outubro de 2021 O concello de Outes reforzará o servizo do Punto de Atención a Infancia coa contratación de unha persoa a tempo parcial até final de ano. Así o anunciou o alcalde, Manolo González, logo de reunirse co persoal do PAI así como de recibir as queixas dalgúns pais e nais usuarias deste servizo. Segundo indicaron fontes muncipais, a problemática principal reside no elevado número de nenos menores de 12 meses que usan de maneira simultánea este servizo, ate 7 bebes, algo que non aconteceu o curso pasado. Actualmente o PAI, que ofrece os seus servizos de 8 a 19 h, conta con 4 profesionais, polo que os ratios de 10 nenos por profesional cúmprense en todo o momento.  Aínda así o plantel actual verase reforzado cunha quinta persoa durante 5 horas ao día, para dar apoio neses picos de traballo. Este reforzo estenderase ate final de ano, e posteriormente avaliarase se é precisa a súa continuidade, informaron fontes municipais. 

Dende o goberno tamén anunciaron que nas vindeiras semanas sairá a licitación o proxecto de adaptación da planta baixa do colexio vello do Cruceiro de Roo para albergar o novo PAI. O alcalde, Manolo González, indicou que o goberno é consciente de que as instalacións actuais teñen un tamaño e unha distribución inadecuada, “e por iso xa en 2020 se elaborou un proxecto para trasladar o PAI a un espazo máis amplo e adecuado do colexio vello, no Cruceiro de Roo”. González indicou que o grupo de goberno presentou este proxecto ao pleno en outubro de 2020, para ser financiado cos remanentes de tesourería. A oposición votou en contra de usar eses fondos para este e outros proxectos, e posteriormente instou ao goberno a que se incluíra no Plan de Obras provincial. “Nós daquela xa advertimos que iso retrasaría varios meses o inicio das obras, posto que os proxectos do POS levan un trámite máis longo, por iso parécenos unha hipocresía que agora algún grupo que provocou o retraso destas obras, pida que se aceleren. De terse aprobado o uso dos remanentes, agora posiblemente xa teriamos o PAI no Cruceiro”, afirmou o alcalde. Dende o concello tamén se indicou que a imposibilidade de trasladar o PAI até o ano que vén ao Cruceiro foille trasladada a todos os pais e nais antes do inicio do curso.