A concelleira de Cultura, Chelo Martínez, presentou a programación cultural de Noia ata finais de outubro xunto con Alicia Díaz e Ramón Mayán, representantes do Cineclub Claudio Guerín. A proposta recupera, tras o verán, unha oferta regular con actividades para públicos de todas as idades.
“Queremos que a cultura volva formar parte da vida cotiá de Noia despois do verán, cunha programación estábel, de calidade e na que todas as persoas poidan atopar algo do seu interese”, sinalou Chelo Martínez.
A concelleira destacou a variedade dunha axenda que inclúe teatro profesional e afeccionado, espectáculos infantís, maxia, música e encontros literarios.
Unha das citas máis esperadas será a charla de Nieves Concostrina, o mércores 30 de setembro ás 20:30 horas. A actividade terá lugar finalmente no Liceo de Noia, polo que queda modificada a localización indicada no cartel da programación.
Entre as propostas de outubro figuran tamén os espectáculos teatrais Sol Fuerza e A toupiña que quería saber quen lle fixera aquilo na cabeza, a actuación musical Selene, de Pablo Sax, e distintas funcións de teatro afeccionado.
Á programación súmase o IV Ciclo Cine na Vila, organizado co Cineclub Claudio Guerín. As proxeccións serán no Coliseo Noela ás 19:30 horas: Tres adioses, o 27 de setembro; I Swear, o 11 de outubro; e Romería, o 24 de outubro.
“É un pracer continuar colaborando na programación cultural de Noia cun novo ciclo que, como sempre, achega ao público obras do ámbito nacional e internacional”, expresaron desde o Cineclub. Entre elas destacaron I Swear, que obtivo dous premios BAFTA en 2026, nas categorías de actor protagonista e reparto.
