Os tres detidos por unha pelexa en Ribeira quedan en liberdade tras pagar a fianza

Os mozos detidos pola Policía Nacional, acusados de darlle unha malleira a outro en Bandourrío, quedaron en liberdade tras pagar a fianza. As familias abonaron o diñeiro. A vítima segue recuperándose dos golpes recibidos e foi operada da fractura do nariz no Hospital Clínico de Santiago, así como dun pómulo que tamén acabou esnaquizado. O mozo estará en observación no centro hospitalario.

Lembramos que o pasado 25 de setembro, tal como informamos en obarbanza.gal un mozo de 19 anos veciño de Ribeira tivo que ser levado ao Clínico de Santiago despois de recibir unha malleira no barrio de Bandourrío.

O mozo que estaba na porta dun pub recibiu un golpe na parte posterior da cabeza e tras darse a volta e dirixirse ao mozo que presuntamente o golpeou, e supostamente sen practicamente mediar palabra este propinoulle unha puñada na cara. Aínda que o agredido se defendeu, na pelexa entraron outros dous ou tres novos máis, que seguiron golpeándoo na cara ata tiralo ao chan e propinarlle varias patadas no rostro.

A Policía Nacional de Ribeira detivo a tres individuos “por un delito de lesións”. Trátase de tres varóns con idades comprendidas entre os 19 e os 21 anos, veciños de Ribeira.