O Noia FS está imparable. Sete vitorias e un empate neste arranque ligueiro, e o sétimo triunfo chegou cunha goleada nunha das canchas máis complicadas da Segunda División, na do Uma Antequera (1-7).
Chus abriu o camiño do triunfo no minuto 3 cun potente disparo coa zurda que non puido deter Conejo. Seguiu o Noia atacando e Edu Jabá non perdoou para facer o 0-2. Os de UMA estaban atordados ante a a avalancha noiesa. Ante isto, Marlon Velasco pediu que lle imprimisen unha marcha máis ao encontro e fóronse ao descanso cunha vantaxe de 0-4 con goles de Bruno Gomes e Pirata.
Nos segundos 20 minutos, Dani Ramos devolvía a esperanza aos antequeranos. Unha xogada embarullada serviu para poñer o 1-4 co que volvía a esperar o respectable. Sen embargo, o Portus Apostoli non tardaría en devolver a diferenza a catro goles. Joaki, nunha transición, puxo o quinto.
A partir de aí, o UMA sacou o porteiro xogador, pero non puido tombar o muro noiés. Un dobrete de Edu Jabá nos últimos 3 minutos deixaría o marcador final nun sorprendente 1-7. O técnico Marlon Velasco mostrouse moi satisfeito co rendemento do equipo.
A vindeira xornada de liga, o Noia FS recibirá ao Ejido Futsal, pero antes este mércores 27 ás 20 h os noieses visitan ao CD Otxartabe na segunda rolda da Copa do Rei.
