O Concello de Porto do Son presentou na tarde deste 21 de outubro, na Casa da Cultura, os detalles da iniciativa Hostelería #PorElClima, a plataforma de Ecodes e Coca-Cola que impulsa a acción contra o cambio climático no sector. Os detalles do programa foron dados a coñecer polo alcalde Luis Oujo, quen lembrou que a descarbonización, a través da redución de emisións de CO2, é “unha aposta firme do Concello no marco do seu traballo a prol da sustentabilidade”. Este, dixo, foi o motivo polo cal o Goberno sonense convidou á multinacional de bebidas para presentar na Casa da Cultura a iniciativa Hostelería #PorElClima, que a compañía impulsa xunto á Fundación Ecodes e a Hostelería de España.
A tenente de alcalde responsábel de cambio climático no Concello, María Maneiro, foi a encargada de dar a benvida aos asistentes e, durante a súa intervención, agradeceu a existencia deste tipo de iniciativas relacionadas coa redución do impacto do sector sobre o medio ambiente, “contribuíndo así á súa sustentabilidade non so ambiental, senón tamén económica e social”.
A xestora de Comunicación de Coca-Cola Europacific Partners Iberia, Gema Domínguez Barral, presentou os detalles da plataforma Hostelería #PorElClima, onde se proporcionan as claves da loita contra o cambio climático e se descobren as pautas a seguir para contribuír á redución do impacto no medio: “Este sector constitúe un ámbito produtivo de gran importancia para a economía española. Atopámonos nun momento clave no que a hostalaría pode dar a coñecer o seu compromiso coa sustentabilidade e a loita contra o cambio climático e aproveitalo para convertelo nun elemento que contribúa a dar un impulso á súa recuperación económica nunha situación como a actual”, explicou.
O alcalde, que pechou a xornada, destacou a importancia de apoiar ao sector hostaleiro e agradeceu a Coca-Cola a súa iniciativa non só de fomento da sustentabilidade na hostalaría, senón tamén orientada a dar visibilidade aos establecementos comprometidos na loita contra o cambio climático. “No Concello de Porto do Son estamos convencidos de que o futuro pasa por ser responsábel e respectuoso co medio ambiente e co planeta. De aí o noso apoio a iniciativas comprometidas coa contorna e o noso traballo por desenvolver actividades que dean un paso máis no impulso do coidado da sustentabilidade contra o cambio climático”, subliñou Oujo.
A continuación, o brand ambassador de Coca-Cola Adrián Costa impartiu unha formación con diferentes combinados adaptados ás novas ocasións de consumo.
Hostelería #PorElClima naceu no ano 2017 tras o chamamento mundial para adoptar medidas que contribuísen a frear a emerxencia climática e permitisen facer realidade un mundo mellor e máis sustentábel. Segundo explicaron no acto deste xoves, constitúe unha plataforma virtual que une á comunidade de establecementos que decidiron comprometerse coa sociedade, coa nosa contorna e cun futuro mellor. Forma parte da Comunidade #PorElClima e está desenvolvida por Ecodes coa colaboración estratéxica e o impulso de Coca-Cola e o apoio de Hostalería de España.
Hostelería #PorElClima facilita, cun enfoque positivo centrado nas solucións, que as empresas de hostalería se sumen aos obxectivos do Acordo de París e consigan converterse en establecementos neutros en carbono. Desde que se puxo en marcha en 2017, máis de 1.100 establecementos adheríronse á iniciativa, 200 deles en Galicia, desenvolvendo máis de 11.000 accións polo clima. Ademais, para dar relevancia e visibilidade ás boas prácticas do sector, a web de Hostelería #PorElClima publicou máis de 150 historias e seis casos de éxito.
