O Concello de Ribeira anunciou que levará ao pleno de outubro a modificación de ordenanzas fiscais, “un punto no que proseguindo a tónica dos últimos exercicios a inmensa maioría de tributos serán conxelados ou reducidos”, sinalou a primeira tenente de alcalde, María Sampedro, quen debullo este luns 18 de outubro as grandes liñas tributarias a nivel local de interese para a cidadanía. Segundo fixo saber, o Imposto de Bens Inmobles (IBI) continúa “no mínimo legal (o 0,4%)” mentres que o Imposto de Vehículos de Tracción Mecánica diminúe un 2%.
Ao fío do segundo imposto, a edil explicou que dende que “se comezou a reducir este imposto no 2015 xa se rebaixou en máis dun 10% e que con esta nova diminución Ribeira sitúase entre os municipios de Arousa norte que máis baixos o teñen”.
Pol que se refire ás taxas, a concelleira destacou “a significativa baixada que por fin se vai poder aplicar á depuración despois de que o Concello puidese adxudicar este servizo tras superar diversos atrancos”. Segundo fixo saber, “será un 9,3% menos o que a veciñanza notará nos seus recibos”. Ademais, dixo, “as persoas perceptoras da RISGA desfrutarán, tanto neste tributo por depuración como nos de saneamento e auga, dunha bonificación do 55% en lugar do 50% actual”.
Polo que respecta ao Conservatorio, as bonificacións por segundo fillo ou outro membro dunha unidade familiar pasarán do 25% ao 50%; mentres que as aplicábeis a partir do terceiro membro pasarán do 50% ao 75%.
Ademais, María Sampedro avanzou que “por terceiro ano consecutivo non se cobrarán as terrazas aos establecementos de hostalería no ánimo de axudar a un dos principais sectores afectados polos efectos económicos da pandemia”.
Outras modificacións fiscais están dirixidas a clarificar ou axilizar certos trámites relacionados coa ordenanza fiscal reguladora da taxa pola ordenanza municipal nas comunicacións previas ou a taxa pola realización de actividades urbanísticas.
Tamén se modifica o artigo 9 da ordenanza do ICIO coa finalidade de “clarificar e concretar a documentación a achegar polos interesados como custe real e efectivo das construcións, instalacións ou obras realizadas”.
