O alcalde de Boiro, José Ramón Romero, compartiu nun comunicado a súa postura sobre os orzamentos da Xunta de Galicia previstos para 2022 e nel achega un punto de vista crítico sobre os mesmos, laiándose de que Boiro “volva quedar ao marxe deles para este ano vindeiro”. No comunicado sostén que “ningunha das propostas realizadas na emenda dos orzamentos de 2021 foron contempladas este ano” e, demais, “tampouco aparecen reflectidas no borrador dos orzamentos que se presentou para o seguinte exercicio”.
Entre as propostas reiteradas polo Concello de Boiro para incluír nos orzamentos dos últimos anos está a dotación orzamentaria para a execución dunha segunda depuradora, a realización de reformas na depuradora de Cabo de Cruz, o saneamento do río Coroño, as melloras na AC-305, a creación dunha residencia da terceira idade ou a dotación dunha terceira gardería infantil.
“Todas estas solicitudes trasladadas á Xunta de Galicia en reiteradas ocasións son demandas dos veciños e veciñas de Boiro. Unhas necesidades que, unha vez máis, quedan á marxe dos orzamentos da administración autonómica”, lamenta o alcalde.
