Máis de 150 persoas participaron onte martes no concerto “As músicas do Camiño”, que Roi Casal ofreceu no campo da festa de San Roquiño (Lousame).
Un concerto de case dúas horas de duración, debido aos bises solicitados polo público presente, que nas últimas pezas mesmo se animou a levantarse das súas cadeiras para botar unhas bailas.
“Non teño máis que palabras de agradecemento para o público de Lousame. Vou a casa satisfeito e cunha sensación de paz interior”, indicou Roi Casal nada máis rematar o concerto.
Unha conexión na que tivo moito que ver a presenza do lousamiá Xoán Leis Varela entre o elenco de músicos que acompaña a Roi Casal nesta xira. “Iso sen dúbida axudou a que nos viran máis próximos”, recoñeceu Casal.
Un punto no que coincidiu a concelleira de Cultura de Lousame, Silvia Agrafojo, que cualificou de “espectacular o concerto de Roi Casal no campo da Festa de San Roquiño. Boa música en boa compañía”.
O músico galego destacou que “viñamos de concertos moi grandes, con milleiros de persoas na Praza da Quintana. E agora son lugares máis pequenos: Chantada, Quiroga, Lousame…e ves que en Galicia tes pobos pequenos que teñen un gran dinamismo, nos que a xente participa toda e é unha forma de chegar a un público que doutra forma sería imposible”.
Sobre o concerto, Roi Casal explicou que “As Músicas do Camiño é unha recompilación de temas da miña etapa previa a Son Galego, Son Cubano, que foi un punto de inflexión na miña carreira. Quería recuperar esas cancións e reencontrarme coa xente no camiño con esas músicas”.
