A Asociación de Axuda a Nenos Oncolóxicos de Galicia, ASANOG, coa colaboración do Servizo de Deportes do Concello de Rianxo, vai organizar unha proba deportiva en beneficio da entidade. Trátase da primeira edición da Andaina Solidaria ASANOG, que ten o obxectivo concreto de recadar fondos para a asociación: o cen por cen do recadado a través das inscricións. A cita é o vindeiro 6 de novembro a partir das 10.30 horas, en Rianxo. Nela, Adrián Mosquera, o primeiro deportista olímpico rianxeiro, será o padriño da proba.
Data e horario
Sábado, 6 de novembro.
A saída do evento realizarase a partir das 10:30 horas, segundo o protocolo COVID que marque a lexislación vixente na data de celebración da proba.
Categorías e percorridos
Establécese unha única categoría con independencia da idade. A andaina conta con un percorrido circular, con saída e chegada na praza de Castelao, e con dous niveis de dificultade:
– O primeiro, o percorrido verde, de catro quilómetros de itinerario.
– O segundo, o percorrido amarelo, de 11 quilómetros de itinerario.
Inscrición e prazo
A inscrición poderase formalizar até as 24.00 horas do 4 de novembro de 2021. Poderase facer en liña (a través da web Emesports.es) ou de xeito presencial (no Servizo de Deportes, no Supermercado Claudio da rúa Setefogas, no establecemento O Cesar ou na praza Castelao até 15 minutos antes do inicio da proba). Esta terá un límite de 500 participantes. Os dorsais recolleranse na saída da carreira o mesmo día do evento, entre as 9.00 e as 10:30 horas. O prezo é de 10 euros para todas as persoas maiores de idade e de cinco para as persoas menores. É obrigatorio inscribirse e retirar o dorsal para participar na andaina.
Dorsal solidario
Se non se pode participar na andaina, pódese colaborar doando a cantidade desexada a través da pasarela de pago ou na Praza de Castelao o día da proba.
Agasallos
Camiseta conmemorativa para todas as participantes na andaina (ata fin de existencias).
