Asociación Amicos levou a cabo unha xornada de concienciación ambiental marcada dentro do Proxecto Re-Mar II (Custodia ambiental para a redución de residuos no Espazo Mariño Protexido das Rías Baixas). A cita foi este 7 de outubro no Centro Social de Cabo de Cruz.
O proxecto Re-Mar II presentouse como unha continuidade do proxecto Re-Mar, posta en marcha tras un ciclo de entrevistas e reunións cos axentes colaboradores na primeira edición da iniciativa (confrarías de pescadores, colexios, administracións públicas con competencias en materia de conservación do medio ambiente e do patrimonio marítimo, entre outros axentes).
O obxectivo é “aproveitar os esforzos realizados durante a primeira fase de Re-Mar, en relación á xeración de lazos de traballo colaborador cos distintos axentes para a recollida de residuos”. Con estes vimbios, nesta prolongación do proxecto buscarase consolidar unha rede de colaboradores máis ampla que “custodie todo o territorio das Rías Baixas”, explicouse na presentación, engadindo a intención de acadar que “as accións de recollida de residuos deixen de ser puntuais, senón que deben estar coordinadas e integradas como unha boa práctica cidadá habitual”. Por iso, sinalaron os responsábeis de Amicos, “contemplamos a participación doutros axentes como mariscadores/as, bateeiros, clubs náuticos e empresas do sector pesqueiro, e ademais ampliamos a zona de actuación, realizando mostraxes e recollidas en desembocaduras de ríos situadas a pé das rías”.
A área xeográfica de actuación é o espazo protexido da Rías Baixas que abrangue o Parque Nacional e máis as contornas dos ríos Ulla e Lérez e as rías de Arousa, Pontevedra e Muros e Noia.
Os traballos de Re-Mar II xa comezaron a materializarse esta semana, cunha limpeza colectiva levada a cabo este xoves 7 de outubro polos voluntarios de Amicos e os integrantes da Confraría de Cabo de Cruz, que recolleron 27 quilogramos de plásticos, 3 quilogramos de mestura, e 1 de vidro. A xornada continuou pola tarde co obxectivo de presentar as accións do proxecto Re-Mar II, nela participou a xerente do GALP Ría de Arousa, Rosa Carballo, o director do Parque Nacional Marítimo Terrestre das Illas Atlánticas, José Antonio Fernández Bouzas, o presidente da Asociación de Mariscadores de Aguiño, Manuel Angel Reiriz Gonzalez, o patrón maior da Confraría de Cabo de Cruz, José Manuel Pérez, o patrón maior da Confraría Aguiño, José Antonio Santamaría, a vicepresidenta da Asociación Amicos, Digna Iglesias, o director xeral de Amicos, Xoan España e máis distintos axentes, mariscadores/as, bateeiros, clubs náuticos, colexios e empresas do sector pesqueiro.
Na xuntanza comentáronse as boas prácticas que se están levando a cabo no territorio e, mediante unha dinámica participativa na que traballaron todas as persoas da contorna das rías Baixas, buscáronse novas ideas para previr a xeración de lixos mariños.
