O xefe de Aduanas en Galicia, Jaime Gaya, advirte que desde o ano 2017 produciuse un repunte do narcotráfico por vía marítima, “sen dúbida polo incremento da produción en orixe en Sudamérica”.
Nunha entrevista concedida este domingo a Radio Nacional de España en Galicia ( RNE), asegurou que entre 2014 e 2017 observouse unha caída para logo volver subir ata o punto de que 2021 está a ser “un ano con moitísima actividade marítima”. De feito, no que vai de més, a unidade ha aprehendido 12 toneladas de cocaína.
Ademais, Gaya negou que a pandemia fixese desaparecer o narcotráfico a pesar de que se prevía “un esborralle” porque “a xente estaba nas súas casas”, había “limitacións á circulación” e “o lecer nocturno, ao que en moitos casos está asociado o consumo de drogas, desaparecera”. Na pandemia seguíronse facendo aprehensións”, explicou o xefe de Aduanas en Galicia, quen insistiu en vincular este fenómeno á “sobreproducción en orixe”.
Tras unha semana na que foron interceptados en augas do Atlántico dous ‘ narcoveleros’ con 5.200 e 2.000 quilos de cocaína, respectivamente, Jaime Gaya sinalou que este tipo de embarcacións “sempre foi un dos posibles medios de achegar a droga” ás costas, aínda que estas cantidades tan grandes “non eran habituais”.
E é que habitualmente “o tramo último de introdución” destas substancias no litoral “non a fai o veleiro”, senón que o habitual é empregar lanchas pequenas.
O xefe de Aduanas en Galicia destacou que España conta cunha “estratexia de Estado” que é “moi agresiva e innovadora a nivel internacional”. Para empezar, prohibiuse a circulación de lanchas pneumáticas semirrígidas de eslora superior a oito metros e de motores de máis de 150 quilowatts “salvo que estean censadas ou cunha serie de requisitos formais”.
“Iso dificultou moitísimo a actividade das narcolanchas”, aseverou, debido a que, agora, estas embarcacións “non poden estar atracadas nun peirao”.
