O delegado territorial da Xunta na Coruña, Gonzalo Trenor, e o alcalde de Porto do Son, Luis Oujo, supervisaron o proxecto das obras saneamento na parroquia de Queiruga, que suporá a construción dunha nova estación depuradora (EDAR). Esta actuación, sinalaron, contará cunha partida de arredor de 500.000 euros nos orzamentos da Xunta para o 2022 e o obxectivo de Augas de Galicia é poder licitar esta actuación antes de que remate o ano. Trenor recalcou que “esta obra suporá un investimento autonómico que supera os 1,7 millóns de euros”.
O representante do Goberno autonómico explicou que a Consellería de Infraestruturas e Mobilidade, a través de Augas de Galicia, conta xa co proxecto, que este 29 de outubro presentou a empresa encargada do mesmo, á espera de que o Concello remate os últimos trámites municipais para poder licitalo.
O delegado da Xunta fixo saber que “as actuacións previstas pretenden mellorar o sistema de saneamento existente mediante a construción dunha nova EDAR no lugar da Ponte”. Ademais, dixo, proxéctase “unha nova rede de colectores de augas residuais, tres estacións de bombeo e dúas impulsións para a condución das augas ata a nova estación”, ao que cómpre engadir “a execución de dous colectores de augas pluviais”.
A rede de Queiruga estaría composta por un total de 10 colectores, 8 por gravidade e 2 por impulsións. Tamén son precisas 3 estacións de bombeo nos lugares de Tarrío, Seiras e A Ponte. En total prevese a construción dunha rede de colector de augas residuais, pluviais e impulsións que suman máis de 5.300 metros de lonxitude en total. Trenor recalcou que “a nova instalación suporá un gran avance para a rede de saneamento dos principais núcleos costeiros de poboación do municipio”.
