ADEGA fixo balance do acadado na catorce edición da Limpeza simultánea de ríos, organizada este pasado domingo, 26 de setembro, ao abeiro do Proxecto Ríos. En total, o voluntariado participante (793 persoas) foi quen de recoller, en diferentes cursos fluviais da nosa terra, máis de 13 toneladas de refugallos. Aproveitaron para pór de relevo a necesidade de seguir traballando para coidar o noso medio natural, fomentando a concienciación e habilitando medidas efectivas dende as administracións que rematen coa práctica de usar os nosos ríos como vertedoiros. A limpeza simultánea levouse a cabo en 51 municipios galegos, incluído o de Rianxo, da man da Asociación Veciñal de Araño e coa colaboración do Concello. Os traballos no territorio rianxeiro focalizáronse no río Te, con media ducia de persoas voluntarias e 90 quilogramos de lixo retirados.
67 entidades
En cada localidade a actividade foi coordinada por diferentes entidades, dende asociacións ecoloxistas, culturais… até fundacións, centros de ensino e concellos, chegando ás 67 entidades. Houbo concellos nos que participaron varias asociacións limpando diferentes ríos como foi o caso de Gondomar, Ames ou Santiago de Compostela, entre outros. Este ano fíxose a limpeza en 50 treitos de río e participaron 793 persoas, “unha boa participación para os tempos que corren”, salientou ADEGA.
Un amplo abano de cousas que non deberan estar no río
Desta volta recolléronse refugallos moi variados, e coma sempre abundaron os plásticos: botellas, garrafas, bolsas, sacos… Apareceron rodas, baterías e motores de automóbiles, cristais e latas; tamén pilas, restos de madeira, mobles, ferralla, algún televisor e entullos. Retiráronse uralitas, roupa, calzado, etc… Ademais, as toalliñas húmidas para hixiene persoal volveron a aparecer en abundancia e tamén máscaras. “É preciso reflexionar sobre o uso destes artigos, e aínda máis sobre o lugar que empregamos para desfacernos deles, xa que ao tiralos polo retrete rematan nos nosos ríos contaminando os leitos e ribeiras”, insistiu a asociación ecoloxista.
Proxecto Ríos é un proxecto promovido por ADEGA dende o ano 2005 e financiado por Augas de Galicia, que depende da Consellería de Infraestruturas e Mobilidade. Para esta actividade contamos coa colaboración dos Concellos de A Estrada, Allariz, Ares, Ames, Arzúa, Carballo, Fene, Foz, Gondomar, Meis, Melide, Nigrán, Ponteareas, Pontevedra, Rianxo, Ribadumia, Salceda de Caselas, Santiago de Compostela, Teo, Tomiño, Verín e Xinzo de Limia.
