O BNG seguirá a traballar para que a pesca artesanal galega sexa excluída do Regulamento de Control da UE

24 Setembro 2021

A portavoz do BNG en Bruxelas, Ana Miranda, e as deputadas nacionalistas Rosana Pérez, Carmela González, e Daniel Castro expresaron este 24 de setembro o total apoio da agrupación que representan ás críticas manifestadas pola Federación Galega de Confrarías a respecto da singularidade da pesca artesanal galega fronte á aplicación do Regulamento de Control de Pesca da UE. “Temos unha preocupación moi grande pola situación da pesca galega e pola desatención por parte das administracións”, manifestaron.

No encontro mantido entre a Comisión de Pesca do Bloque e unha delegación da Federación Galega de Confrarías, encabezada polo seu presidente José Antonio Pérez, resaltouse “o carácter singular da pesca artesanal galega, fronte á do resto do Estado”, no sentido de que “xa existe un forte control dixitalizado das capturas”. Seguindo este fío, salientaron que desde as lonxas galegas xa se emiten os datos diariamente de xeito dixitalizado.

“O problema é que desde Europa non se coñece a situación e as condicións de traballo da pesca artesanal galega, e isto quedou totalmente patente tras a visita realizada a semana pasada polo Comisario de Pesca”, salientou Ana Miranda, quen expresou o seu compromiso a seguir defendendo nas institucións europeas a singularidade da pesca galega, así como a solicitar un encontro co Comisario.

Presión en Bruxelas

Ao respecto, a portavoz do Bloque en Europa subliñou “a necesidade de seguir facendo un grupo de presión en Bruxelas co obxectivo de defender ao sector e dar a coñecer a situación da pesca galega”. Neste sentido avanzou que unha das reivindicacións que defenderá será “a de que as Confrarías se recoñezan como Organización de Produtores”. E engadiu: “Non ten sentido que se traia ao comisario para facer unha visita por Cíes de dez minutos cando o sector pesqueiro está atravesando unha situación moi complicada, por iso é necesario que unha delegación da Federación de Confrarías se traslade a Bruxelas para entregarlle un informe completo do día a día da pesca galega”.

Pola súa banda, as deputadas Rosana Pérez e Carmela González e o deputado Daniel Pérez avanzaron que seguirán presentando iniciativas no Parlamento Galego incidindo no excesivo control que xa existe actualmente no sector. “Resulta crucial que o goberno galego deixe de mirar para outro lado e defenda o sector”, incidiron, ademais de “estar vixiantes a respecto da mariña eólica, para que non afecte á pesca”.

Outros artigos

I Concurso Infantil de Debuxo ApiBarbanza – 2024

A delegación de AGA, asociación Galega de Apicultores, no seu Delegacion do BARBANZA SALNES convoca I Concurso Infantil de Debuxo Apícola co fin de involucrar e concienciar aos nenos sobre o valor da abella como axente polinizador e na conservación do medio...

+

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...