O Bloque Nacionalista de Galego vén de emitir un comunicado no que mostra a súa preocupación polo futuro da Ponte Nafonso e pola natureza dos traballos que se están a realizar nela para rehabilitala e poñela en valor. A agrupación recoñece que “logo de presenciar as obras de restauración da ponte que afectan aos concellos de Outes e Noia, entendemos que é preciso que a Xunta faga unha modificación do proxecto para arranxar o problema xurdido polas infraestruturas de telecomunicacións e que se conserve e manteña o histórico peitoril de pedra”.
Os nacionalistas tamén fan saber no seu comunicado que “levan anos demandando unha actuación integral que consideran moi necesaria” e tamén a restitución do peitoril de pedra que se retirou no seu momento para anchear a vía: “Sabemos do gran valor histórico, cultural e paisaxístico que supón a ponte para a nosa comarca e queremos poñela en valor dende hai moito tempo e é por iso polo que nos preocupa a actuación que se está a desenvolver” indican dende a formación.
Para o BNG, unha das principais eivas da posta en valor da construción radica no feito de que non se contemple a existencia de tubaxes de telecomunicacións, non entendendo que nin as dúas administracións locais implicadas nin a Xunta “reparasen nunha cuestión tan notoria”. Segundo engaden, “unha vez recoñecido o problema, pretenden elevar o firme do empedrado por riba do previsto, unha improvisación que provocaría que as varandas de ferro se teñan que elevar, coa axuda dunhas novas columnas de pedra, por enriba dos apartadoiros”.
Os nacionalistas demandan que “se proceda coa reparación do dano feito ao abrir a gabia de telecomunicacións e que non se deixe feita unha chapuza o rematado da varanda”.
