O Colexio de Arquitectos de Galicia celebra a súa XIX edición dos Premios COAG de Arquitectura coa participación de 197 propostas visadas, executadas e finalizadas no ámbito territorial da entidade colexial entre 1 de agosto do 2018 e o 30 de setembro do 2020. Unha vez máis, a comarca do Barbanza vai ter un importante protagonismo, cun feixe de propostas innovadoras que abren novos horizontes á construción na nosa terra sen perder de visita os grandes logros edificativos dos que partimos.
Exemplos disto son as seguintes candidaturas: unha nova vivenda unifamiliar en Fonte Ramil (Castiñeiras, Ribeira) da man de Óscar Luis Rodríguez Ramos, a Surf House de Frieiro (Miñortos, Porto do Son) a cargo de Doesmás Arquitectos (Álvaro Marín e Alfonso Castro); a rehabilitación dunha vivenda unifamiliar en Miraflores (Muros), da man de Iago Fernández Penedo e Óscar Fuertes Dopico; as obras para mellorar a caseta de pescadores do Coído (Tal, Muros), desenvolvidas por Jorge Enríquez Méndez; a reforma das instalacións de Dúo Estilistas en Boiro (levada a cabo polo Estudio de Arquitectura Puntocero); e a rehabilitación de Clínica Dental EV en Boiro (Estudio de Arquitectura Puntocero). Asemade, atópase entre as candidaturas o estudo Arquitectura dende a paisaxe. Implantación de desenvolvemento pecuario e investigación na Barbanza, a cargo de Alicia Casanova Adán.
O acto público de entrega de premios celebrarase o 25 de setembro pola tarde no Pazo de Baión en Vilanova de Arousa (Abelleira 4,5,6, Baión). O evento conta coa colaboración das empresas Porcelanosa Grupo, Exlabesa Architecture, Pazo Baión, Grupo Aluman, Fundación Laboral de la Construcción de Galicia, Condes de Albarei, Ramírez Construcciones e Tejas Verea.
Segundo informa o COAG, as propostas participantes están incluídas dentro destas nove categorías: residencial de nova planta (na que se distingue entre vivenda unifamiliar con 31 candidaturas, e vivenda colectiva, con 3 candidaturas); outros edificios de nova planta, 15; obras de restauración e rehabilitación, 49; obras de interiorismo, 41; arquitecturas efémeras e deseño, 15; deseño de espazos urbanos, xardinería e paisaxismo, 16; divulgación e investigación, 14; Proxecto Fin de Carreira, 13; e categoría especial a toda a Traxectoria Profesional que se fallará previamente á gala de entrega dos galardóns.
A decana do COAG, Elena Ampudia, manifesta a satisfacción da xunta de goberno do colexio oficial pola “alta participación” no certame, e agradece a todas as colexias e todos os colexiados o seu entusiasmo con estes premios: “Será bastante complexa a elección de finalistas data a calidade de todas e cada unha das candidaturas”. Quixo tamén agradecer a resposta dos patrocinadores que colaborarán para celebrar, nunha gran gala de entrega de premios, a excepcional calidade da arquitectura galega, pero apuntou que aínda están pendentes varias incorporacións.
O xurado está composto pola decana do Colexio de Arquitectos de Galicia, que actuará como presidenta; como vogais, a arquitecta e vicepresidenta da Ordem de Arquitectos de Portugal, Paula Santos; o arquitecto Antonio Ortiz; a arquitecta e responsable da Comisión de Cultura do COAG, Emma Noriega; a arquitecta Ana Couto, responsable da Comisión de Urbanismo e Territorio do COAG; e a arquitecta e secretaria da Xunta de Goberno do Colexio, Elvira Carregado, que actuará de secretaria do xurado. O xurado avaliou detidamente as propostas recibidas e fixo unha selección previa de cinco obras finalistas por categoría, elección que se fará pública proximamente. O ditame final farase público na gala de entrega de premios.