Os equipos de intervención finalizaron os labores de extinción do incendio orixinado na zona de fundición da fábrica de aluminios empresa Cortizo situada en Padrón.
Segundo a información recollida no 112 Galicia, arderon os filtros do interior do silo, onde os servizos de emerxencia contiveron o lume para evitar a súa propagación, sen que ningunha persoa resultase ferida nin afectada, nin tampouco se produciu ningún tipo de contaminación.
Pasadas as catro e media da madrugada, o 112 Galicia recibiu a chamada dunha persoa particular que alertaba dun incendio no interior dunha nave industrial, na estrada de Padrón cara Noia. Na mesma comunicación, o particular afirmaba que non había persoas feridas.
A partir de aí, os xestores do Centro Integrado de Atención ás Emerxencias (CIAE) 112 Galicia comunicáronlle os datos aos Bombeiros de Boiro, aos membros do GES de Padrón, á Garda Civil e, por precaución, ao persoal sanitario.
