Desaloxado con cargas policiais un botellón de 2.000 persoas en Santiago

A policía desaloxou este xoves en Santiago de Compostela a un grupo de máis de 2.000 mozos que se reuniron no exterior dun local de lecer nocturno tras o peche do mesmo e, dadas as queixas dos veciños e o negarse os mozos a abandanonar a zona, foron dispersados con cargas policiais puntuais e dirixidas a grupos concreto.
O alcalde de Santiago de Compostela, Xosé Sánchez Bugallo, na súa habitual comparecencia ante os medios defendeu a actuación policial durante a noite deste xoves nos arredores da discoteca Ruta e na zona do Ensanche compostelán.

A partir das 3,00 horas, ao pechar a mencionada discoteca e ser desaloxado o local, grupos de mozos reuníronse na zona para seguir coa festa e celebrar un botellón. O rexedor matizou que non todos proviñan do interior da discoteca “onde habería 200 ou 250 persoas”, e que a multitude podía alcanzar as 2.000 persoas.

O rexidor compostelán recalcou que a policía actuou tras solicitar aos mozos que abandonasen a zona, algo que non ocorreu e que algúns grupos comezaron a lanzar obxectos -botellas, vasos e similares–, segundo confirmou o propio alcalde, aos axentes, “motivo que provocou a carga policial”. O alcalde asegurou que non lle consta que se disparasen pelotas de goma, como aseguran algúns dos participantes.

O alcalde informou ademais de que hai un axente policial ferido, aínda que “leve e dado de alta”. Nos vídeos gravados por algúns dos mozos, publicados en redes sociais, pódese ver a algún con feridas sanguentas na cabeza; ao que Bugallo aseverou que está “seguro” de que os axentes utilizaron “a forza necesaria e suficiente para conseguir o obxectivo de que se disolvese a concentración”. Aínda non se coñece o balance de feridos entre os participantes na aglomeración.
Este venres, a Policía Nacional informou de que abriu dilixencias polos feitos ocorridos esta pasada noite.