A empresa Proyecon, concesionaria das obras de construción da nova EDAR de Rianxo, solicitou á Policía Local de Rianxo unha modificación temporal do tráfico na rúa Paseo da Ribeira, á altura do cruce do Peirao da “T” na zona do estreito.
Segundo informaron os representantes da firma nunha reunión mantida na mañá deste 7 de setembro no Consistorio, con asistencia de representantes da empresa concesionaria, Augas de Galicia, a Confraría de Rianxo, a Asociación Rianxeira de Empresarios, a Asociación Somos Rianxo, persoal da Brigada Municipal de Obras e Policía Local, e presidida polo alcalde e a primeira tenente de alcalde, as actuacións previstas nese punto comezarán o día 8 de setembro de 2021 e terán una duración aproximada de tres meses.
Afectarán á circulación rodada en distintas fases de implantación no treito comprendido entre o peirao de Setefogas á zona dos xardíns.
Durante as actuacións necesarias en dito punto, a circulación de vehículos lixeiros que pretendan acceder ao centro histórico e á zona portuaria así como o tráfico de vehículos pesados con orixe ou destino á zona portuaria deberá efectuarse pola estrada de Tanxil, utilizando o itinerario habitual pola rúa Rosalía de Castro/Estrada de Rianxiño, rúa Arcos Moldes e cruce de Xogo dos Bolos.
Consecuentemente coa remodelación da circulación efectuada na zona antiga habilitáronse zonas de carga e descarga e de parking express na praza de Rafael Dieste. A Policía Local explicou que hai sinalización indicadora colocada.
