Diversas entidades representativas da comunidade social de Ribeira únense para a celebración o vindeiro sábado 18 de setembro no parque periurbano de San Roque do Primeiro Encontro Multicultural: unha novidosa iniciativa que foi presentada este mediodía no consistorio local da man das concelleiras de Cultura e Servizos Sociais, María Sampedro
e Ana Barreiro; de Suso Bello como encargado da dinamización do parque; e de Manuel Mirás, Jonathan Figueirido e Abdelamid Houdda no nome, respectivamente, de Cáritas Ribeira, ICE Renovación e a comunidade islámica no noso municipio, estando tamén implicada Cruz Vermella, que non puido acudir ao acto, ao igual que o obradoiro de cociña O Pote II.
O Primeiro Encontro Multicultural, aberto a todo aquel que desexe participar, é unha das tres actividades incluídas no Festival Raíces, xunto ao concerto de lavandeiras “O río conta historias” ofrecido no lavadoiro do río Pedrín o pasado 15 de agosto e a acción “adopta unha árbore”, pendente de celebrar.
Este encontro é unha proposta socio – cultural que nace coa intención de mostrar a cultura e costumes dos diferentes colectivos que conforman a sociedade plural e diversa do noso pobo, e ao mesmo tempo involucrar á sociedade en xeral na creación e conservación do bosque do futuro. Haberá diferentes propostas de actividades enfocadas aos máis pequenos nun medio natural, co medio ambiente como motor da actividade e o fomento de hábitos de consumo
saudábeis. Unha merenda popular, actuacións musicais e representación da cultura e costumes dos diferentes colectivos que conforman a pluralidade da sociedade en Ribeira.
Programación do Festival Raíces – Encontro multicultural:
16:00 h. – 19:00 h.:
• Obradoiros infantís.
• Contacontos: Contos da natureza con Troskita
• Romaría aberta (trae a túa merenda)
• Actuación musical: Os Monifates
19:00 h. – 22:00 h. :
• Mostra das nacións
• Actuación final: – Chamaquito Pistolas – Doctor Migraña
Tanto as edís Ana Barreiro e María Sampedro, como os representantes dos distintos colectivos implicados animaron á xente a participar neste encontro como exemplo de convivencia. Suso Bello lembrou que dende abril deste ano estase a levar a cabo o proxecto de recuperación e rexeneración do parque, que non se limita só a labores propias do mantemento do monte. Ademais do traballo da reforestación e coidado das especies autóctonas, iniciativas como
“Adopta unha árbore” ou festivais coma “O río conta historias” incentivan a participación de todos os veciños e visitantes ao tempo que apostan pola mestura entre cultura e natureza con eixos tan importantes coma o respecto e convivencia co entorno.
