Este venres, 13 de agosto, os seareiros dos contos mariñeiros que xorden da confluencia e da mestura do real e do máxico (dous ingredientes que teñen xuntado moi ben na nosa tradición oral e literaria) teñen unha cita ineludíbel con Xurxo Souto en Outes, onde achegará as narracións de O retorno dos homes mariños. A función, dirixida ao público adulto, será na terraza do Náutico do Freixo a partir das 21 horas.
O espectáculo é gratuíto pero para asistir cómpre reservar por adiantado no correo cutura@outes.gal.
A actividade, organizada polo Festival Atlántica, é posíbel grazas á Deputación da Coruña, a Xunta de Galicia e mais o Concello de Outes.
Neste sesión de contos Souto rescata un mito coruñés esquecido: o dos homes mariños.
Xurxo Souto autodefínese como “terrícolo redondo”. É escritor, cantante, acordeonista, actor, director e locutor galego. Entre 1990 e 2001 foi o líder e vocalista da banda de rock en galego Os Diplomáticos de Monte Alto. Entre as súas novelas figuran Contos do mar de Irlanda (Xerais, 2014) e a novela A gran travesía de Chiruca Macallás (Xerais, 2018). Polo que respecta a O retorno dos homes mariños (Xerais, 1999, 2020), foi a súa primeira novela e vén de ser reeditada no 2020 coincidindo cos vinte anos da súa publicación.
