O portavoz municipal do BNG no Concello de Porto do Son, Balbino González, realizou unha declaración aos medios no lugar de Eiravedra, parroquia de Goiáns, para atender unha demanda veciñal e dar visibilidade a un problema acontecido durante a pasada fin de semana, cando houbo un verquido orixinado na EBAR (Estación de Bombeo de Augas Residuais) de Eiravedra, que recolle as augas residuais das parroquias de Miñortos e Goiáns. O verquido foi ao río Sancho e chegou até a praia do Langaño, ocasionando un gran dano medioambiental deixando un cheiro pestilente e depositando graxas nas beiras do regato, un dano ecolóxico matando peixes e anfibios, e unha pésima imaxe para o turismo. De nada serve gastar moreas de cartos en campañas publicitarias, como a de “Infinitamente
Natural” e despois dar este lamentábel espectáculo.
Os verquidos de augas residuais nesta zona, veñen sendo reiterados e máis en época estival e o máis preocupante é que non hai indicios de que sexan derivados dunha avaría na estación, xa que, unha vez denunciados os feitos,
automaticamente desaparece o verquido.
Hai dous días o rexedor sonense facía unhas declaracións na prensa onde amosaba a súa preocupación polo elevado consumo de auga potable e como consecuencia un aumento de augas residuais, polo que podemos pensar que
pode ser o motivo destes verquidos, ao verse desbordada a capacidade da depuradora da Aguieira, debido ao aumento do caudal que recibe para depurar.
Facemos un chamamento ás autoridade competentes nesta materia, que xa teñen constancias dos feitos, tanto Seprona como Augas de Galiza, para que realicen un estudo polo miúdo e poñer fin a este problema. E agardamos que o goberno municipal poña todos os medios para evitar estes verquidos.
