Este 30 de agosto comezan oficialmente as actividades do proxecto #ExpediciónRecaladas, no marco do programa Recaladas no Camiño, organizado por Fundamar. Consistirá, entre outras cousas, na creación da que sería a primeira senda do patrimonio industrial marítimo-pesqueiro no Camiño de Santiago polo litoral.
O proxecto inclúe seis días de traballo de campo e a mobilización de dous equipos multidisciplinares de investigadores acabados de titular e procedentes de distintas localidades do territorio estatal, acompañados por un comité académico integrado por Xoán Carmona (Universidad de Santiago), Julián Sobrino (Universidad de Sevilla) Manuel Lara (presidente de Buxa, Asociación Gallega de Patrimonio Industrial) e Iria Sobrino (arquitecta e experta en patrimonio).
A folla de ruta inclúe actividades e encontros con axentes dinamizadores do patrimonio, co obxecto de deseñar a devandita ruta.
O proxecto ten a apoio da Xunta, a través do programa O Teu Xacobeo. Os traballos desenvolveranse nas rías de Arousa e de Vigo, que son, segundo indican dende Fundamar, os dous enclaves “con maior densidade de elementos patrimoniais, o que permitirá explorar e xerar un primeiro xerme itinerario polo patrimonio industrial, no marco de oportunidades que ofrece o Camiño de Santiago polo litoral”.
Os equipos, acompañados polo comité organizador e científico, do que forman parte a Asociación Galega de Patrimonio Industrial Buxa, a Universidade de Sevilla, o Grupo de Estudos de Historia Empresarial e Sectorial Pesca, Industria Comercio da Universidade de Santiago de Compostela e o estudo Noncommon, terán a oportunidade de realizar actividades e encontros con axentes dinamizadores do patrimonio.
Os resultados do traballo de campo serán presentados o 29 de setembro nunha conferencia final no Museo do Mar de Galicia, onde cada un dos equipos dará a coñecer os detalles de cadansúas propostas.
