“O comisario de pesca da UE, xordo e cego”. Antón Luaces

18 Xullo 2021

De non se producir un milagre, Galicia vai perder, como mínimo, un 60% da súa frota pesqueira a moi curto prazo de tempo. E todo porque o comisario de Pesca da Unión Europea, Karmenu Vella, pecha ollos e oídos a todo canto sexa alleo á proposta da Organización Mundial do Comercio (OMC) de retirar as exencións fiscais ao gasóleo-pesca. 

É dicir: o Fondo Europeo Marítimo e de Pesca (FEMP) non vai contribuir -agás que se obre ese milagre- á realización de paradas temporais na pesca, e tampouco axudará a que os pesqueiros se modifiquen ao abeiro dos plans para renovar a frota, cambiar motores, etc.  Tampouco vai revisar o concepto de pesca artesanal, que lle importa tanto como lle pode  importar se unha gaita galega afina en tal ou cal nota. Don Karmenu vai ao seu: liquidar a frota. Váise ao garete -por sermos finos- ,o memorándum presentado vai un par de meses en Bruxelas por España, Francia e Italia con formulacións precisas  para a mellora das axudas á modernización da frota pesqueira no vindeiro FEM, válido para o período 2021-2027. O comisario Vella coida que sería ir “marcha atrás” e opta porque os mariñeiros morran en barcos vellos (perto de 2.000 con máis de 40 anos só en Galicia) debido a que renovar frota significa, segundo el, “aumentar as capacidades de pesca”. Mala chispa!.

Menos mal que Malta é unha illa e don Karmenu un maltés (non sei se falcón ou pomba). Tal e como se dixo neste mesmo xornal polo presidente de Europêche (Asociación de Organizacións Nacionais de Empresas Pesqueiras da UE) e secretario xeral de CEPESCA, Javier Garat, as axudas ao gasóleo pesca non son tal. Trátase dunha exención que, de non se aplicar á frota pesqueira da UE, vai deixar esta en desvantaxe competitiva fronte a aquelas outras de nacións con gasoil máis asequible ou, supostamente, menos control. Léase China, por exemplo.

O prezo do gasóleo pesca, coas bonificacións que aínda son de aplicación, sáelle aos barcos galegos a máis ou menos cincoenta céntimos o litro. Un prezo que será previsiblemente moi superior -fálase do dobre- de sair adiante, como se supón vai suceder, a proposta da OMC que será de aplicación para esa inasumible UE que mantén no seu posto a un comisario que non se sabe exactamente se é un falcón maltés ou unha pomba traída polo vento ata as húmidas terras de Bruxelas.

Que vai reportar á UE a retirada deste tipo de axudas ás frotas pesqueiras comunitarias?. Coido que nada ou, no mellor dos casos, case que nada. Pero a súa repercusión na frota galega -e en xeral na española- será mortal de necesidade, reducindo a actual nun 60% , segundo cálculos do propio sector pesqueiro.

España e outros 9 dos 27 países da UE non aceptan a proposta da OMC, como ben se sabe no seo desta organización supranacional. En teoría, a Comisión de Pesca debe defender o que din os seus socios. Pero non está nada claro que así sexa. E por se fora pouco, o Comitá Europeo das Rexións segue a liña da OMC cara a eliminación das subvencións -non entende a diferenza entre “subvención” e “exención”- o que contribúe a poñer aínda máis en perigo a posición do sector pesqueiro español. 

E menos aínda cando Karmenu Vella aparenta ser un falcón para a frota cando, na realidade, é unha pomba para os intereses da OMC e da UE que se xogan riba da mesma mesa.

Outros artigos

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

+

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...

+

El voto del BNG avala a Maduro”. José Castro López

El pasado día 17 el presidente venezolano, Nicolás Maduro, fue proclamado candidatodel chavismo para las elecciones de julio. Tres días después la Alta Comisionada de lasNaciones Unidas para los Derechos Humanos pedía un proceso electoral “transparente,inclusivo y...

+

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...