Medalla de Ouro de Galicia 2021 ao persoal do dispositivo de vacinación

O titular do Goberno galego, Alberto Núñez Feijóo, anunciou hoxe, na rolda de prensa do Consello, a decisión do Goberno galego de outorgar a Medalla de Ouro de Galicia 2021 ao persoal do dispositivo de vacinación.

O titular do Goberno galego, Alberto Núñez Feijóo, durante a rolda de prensa posterior á reunión semanal do Consello da Xunta. San Caetano, Santiago de Compostela, 01/07/21.

Logo de lembrar que en 2020 foron honrados os profesionais da sanidade galega implicados na atención aos pacientes covid-19, o presidente da Xunta incidiu en que “os profesionais que nos están axudando a saír do túnel a través da vacinación merecen un recoñecemento polo seu labor profesional, rigoroso, sistemático e certamente salientable desde o punto de vista de éxito loxístico e de organización”.

Nesta liña, e tras cualificar este dispositivo como “modélico”, o presidente da Xunta avanzou que “mañá chegaremos aos 3 millóns de vacinas dispensadas; máis de 1.750.000 galegos teñen pasado xa polos distintos centros de vacinación”. Galicia é a día de hoxe a segunda comunidade autónoma con máis porcentaxe de poboación vacinada cunha dose, superando xa o 70%; e tamén ocupa a segunda posición con máis poboación inmunizada, xa que o 54,1% dos galegos xa contan con pauta completa.

Feijóo puxo en valor o traballo dos equipos especiais de enfermaría que dirixen e coordinan o proceso; os equipos de citación, que son claves nun sistema tan complexo e novidoso; o persoal de enfermaría, de xestión e celador que organizou o sistema nos distintos puntos de vacinación; e o persoal sanitario implicado na farmacovixilancia e nos posibles efectos adversos.

A maiores, o presidente da Xunta tamén salientou o labor do persoal encargado de deseñar os sistemas informáticos e dixitais para organizar a campaña de citación masiva, os sistemas de rexistro e a expedición do certificado covid; os encargados da loxística e do reparto das vacinas; os traballadores dos servizos de admisión e de resolución de incidencias; profesionais da microbioloxía e investigadores; empregados dos recintos que se usan como puntos de vacinación masiva, e persoas que colaboran na organización do proceso, como policías ou voluntarios de Protección Civil.