A que vimos de deixar atrás foi finalmente unha fin de semana movida en Boiro, coincidindo co regreso do lecer nocturno. Segundo compartiron este luns 5 de xullo o Concello e máis a Policía Local, rexistráronse dúas detencións, dúas denuncias e varias queixas polos ruídos na primeira fin de semana de apertura de establecementos ata ás 3.00 horas da madrugada. Amais, rexistráronse danos importantes no mobiliario urbano, por exemplo macetas ou papeleiras.
Durante a noite do sábado desaloxáronse e propuxéronse para sanción tres locais por non respectar a capacidade máxima e interpuxéronse un total de 10 denuncias por non levar posta nin portar a máscara facial, alterar a orde pública ou negarse a identificarse e ofrecer resistencia á autoridade. Realizáronse tamén dúas detencións, unha na noite do venres e outra na noite do sábado, por desobediencia e desorde público.
Durante a fin de semana a Policía Local tivo que actuar en varias pelexas e atender diversas queixas por ruídos e aglomeración de xente na vía pública. Rexistráronse tamén numerosos danos en mobiliario público como macetas tiradas, luminarias e papeleiras rotas e danos nunha máquina expendedora.
O Concello lembra que “a programación cultural organizada con motivo das Festas do Verán 2021 está deseñada con todas as medidas de seguridade, control de capacidade de control de acceso para minimizar os riscos”, poñendo o foco en que “todos os espectáculos rematan arredor das 00.00 horas”.
