Este verán a Concellería de Cultura de Noia que dirixe Pepe Pérez puxo en marcha unha innovadora iniciativa para mostrar ante a comunidade en liña o importante talento das e dos artistas locais. Trátase da plataforma Habelos Hainos, un portal cultural que foi definido polo edil como “un lugar de encontro ao que se poden sumar artistas locais de distintos eidos para obter unha maior visibilidade e recoñecemento, ademais de nutrir aos concellos da contorna dunha ampla oferta cultural”.
A información da canteira noiesa, unha base de datos que irá evolucionando a medida que se formalicen novas incorporacións, aparece clasificada por artistas, sector e localizacións. A páxina está aberta a todos os profesionais que queiran empregala para darse a coñecer. O concelleiro fixo saber que “se trata de facilitarlles a tarefa a aquelas persoas ou entidades que estean interesadas en contratar os servizos dun artista”. Tamén indicou que está aberta a posibilidade de estender o radio de acción do portal a outros concellos da contorna do Barbanza e de Muros e Noia.
