Boiro acolle este 24 de xullo a gravación do programa 100 anos de verbena galega da Televisión de Galicia, unha serie de programas musicais que serán emitidos na canle autonómica. Na presentación da actividade participaron o alcalde, José Ramón Romero, a concelleira de Cultura, María Outeiral, o director artístico, Dani Dopazo, e o director do programa, Carlos Alleres.
Tres dos capítulos da serie 100 anos de verbena galega serán gravados o sábado en Boiro para a súa emisión os venres durante o verán. Nesta ocasión a musica soará da man de La Ocaband con 12 persoas convidadas pertencentes a outras orquestras da nosa terra que van repasar a música e historia de épocas polas que pasou a verbena galega.
Os anos polo que se vai facer repaso é o fin de século, década dos 90, o comezo de século e actualidade ata os nosos días. Ademais da parte musical, a emisión do programa inclúe imaxes do municipio que contribúen á difusión turística do mesmo.
A capacidade do público é limitada e require inscrición previa. Para poder asistir, as persoas interesadas deben coller as invitacións de maneira presencial na oficina de turismo do Concello de Boiro a partir deste xoves 22 de xullo, en horario de 9.00 a 14.00 ou de 17.00 a 20.30 horas. Terán prioridade os convites pero, no caso de non completarse aforo, poderase entrar no momento do espectáculo.
