A nosa comarca vaise mobilizar estes luns para mostrar a súa total e absoluta repulsa en contra do asasinato do rapaz Samuel Luiz na Coruña, á porta dunha discoteca onde foi obxecto dunha salvaxe malleira perpetrada por un nutrido grupo de persoas. As mobilizacións contra o crime e contra o que se considera xa un novo e dramático caso de homofobia, estanse a desenvolver e convocar nas redes baixo o cancelo #XustizaParaSamuel.
Se ben o epicentro é na praza de María Pita na Coruña (ás 20.00 horas), a concentración terá resposta en ducias de cidades e vilas da nosa terra. Por exemplo en Compostela (ás 20h na praza 8 de Marzo), en Noia (ás 20.30 horas diante do Consistorio), en Ribeira (ás 20.00 horas perante o Concello) e en Rianxo (ás 20.00 horas na praza de Padrón). As mobilizacións están a ser convocadas polo movemento LGBTI galego nas prazas do país “para denunciar o asasinato homófobo acontecido na madrugada do sábado na Coruña”.
