O Centro Cultural Lustres Rivas de Ribeira exhibe ata os 26 de xuño a exposición “Estampas de Compostela”, do artista santiagués Plácido Amboage.
Composto de 23 obras en tinta chinesa e acuarela, a mostra está dedicada en exclusiva á cidade capital de Galicia e os seus recunchos máis simbólicos, emblemáticos ou inéditos a través dunha serie de vistas realizadas in situ polo autor con plumilla —técnica pouco frecuente na actualidade—, empregando ás veces o branco e negro da tinta chinesa e outras a cor.
O acto inaugural, celebrada o pasado venres, contou coa participación da concelleira Juana Brión e do propio autor.
Nado en 1945, Plácido Amboague ingresou na Escola de Artes e Oficios de Madrid logo de estudar Bacharelato en Santiago, a súa cidade natal. Ao longo da súa traxectoria cultiva distintos estilos, decantándose finalmente polo realismo no óleo e acrílico sobre lenzo, cuns trazos sinxelos e harmoniosos onde destaca o paisaxismo e a
pintura, inspirándose en grandes mestres como Doré.
Tamén cómpre destacar a súa faceta como cartelista, con galardóns como o Premio de Deseño Gráfico San Froilán 86, a Semana Verde de Galicia en Silleda ou a Segunda Semana do Mar en Ribeira.
A mostra pode ser visitada de luns a venres de 10 a 14 horas e de 19 a 21 horas e os sábados de 11 a 14 horas.
