Do 4 ao 26 de xuño o Centro Cultural Lustres Rivas de Ribeira vai dar acollida á exposición Estampas de Compostela, do artista santiagués Plácido Amboage.
A mostra estará adicada en exclusiva á cidade capital de Galicia e os seus recunchos máis simbólicos, emblemáticos ou inéditos a través dunha serie de vistas realizadas in situ polo autor con plumilla, empregando ás veces o branco e negro da tinta chinesa e outras a cor.
O acto inaugural está previsto para o venres ás 21 horas previa reserva en culturaefestexos@ribeira.gal.
O artista
Nado en 1945, Plácido Amboague ingresou na Escola de Artes e Oficios de Madrid logo de estudar Bacharelato en Santiago, a súa cidade natal. Ao longo da súa traxectoria cultiva distintos estilos, decantándose finalmente polo realismo no óleo e acrílico sobre lenzo, cuns trazos sinxelos e harmoniosos onde destaca o paisaxismo e a pintura, inspirándose en grandes mestres como Doré.
Tamén cómpre destacar a súa faceta como cartelista, con galardóns como o Premio de Deseño Gráfico San Froilán 86, a Semana Verde de Galicia en Silleda ou a Segunda Semana do Mar en Ribeira.
A mostra poderá ser visitada de luns a venres de 10 a 14 horas e de 19 a 21 horas e os sábados de 11 a 14 horas.
