O Arroutado brillou de maneira extraordinaria na gran cita velística do Barbanza, coa celebración da XXI Regata Ramiro Carregal Rey. O veleiro de José Manuel Pérez recupera para o seu grímpola Real, a do Náutico de Portosín, o Gran Trofeo Faro de Corrubedo que, desde hoxe, volve ocupar as vitrinas do náutico portosinense, en poder do Deportivo de Riveira desde 2019 grazas á vitoria na vixésima edición do Corsario, de Javier Durán.
Coas probas finalizadas izábase como gran vencedor en Regata o Arroutado, seguido do Siradella, de Francisco Gude, tamén representante do Real Club Náutico Portosín, pechando o podio desta División o Corsario, de Javier Durán, do Club de Iates de Villagarcía.
En Cruceiro/Regata, e sen sorpresas, o vencedor foi o Kanala. O veleiro de Ignacio Ecenarro pechou xornada con outros dous triunfos, facendo, do mesmo xeito que o seu compañeiro de grímpola, o Arroutado, triplete na súa categoría. A posto prata foi para o Monterrei, de Paula Fernández, e o do bronce para o Dracco, de Pablo Oliver, ambos tamén de Portosín.
Finalmente, en Cruceiro levaba a Carregal o Cámping Ría de Arousa, de José Manuel Pombar, do Ro Yacht Club. Segundo foi o Orlando, de Gerardo Sánchez-Brunete, tamén do Ro Yacht Club. E terceiro o Piko Norte, de José Manuel Castro, do Club Náutico de Boiro.
A segunda e última xornada da regata amenceu cunha gran encalmada na Ría de Muros e Noia, unhas augas que pronto tomarían forma coa entrada dun suroeste, co eixo no 245, que portaba entre 8 e 10 nós, o que permitiu a celebración dunha primeira manga tipo barlovento-sotavento de 6 millas de percorrido totais. Tras un role na
dirección da compoñente, o segundo bastón, de 8 millas, navegouse con vento do noroeste, ao establecerse o seu eixo no 285, subindo ata os 12 nós.
A entrega de premios celebrouse ás cinco da tarde no Salón Principal do Real Club Náutico de Portosín, un acto presidido por Ramiro Carregal Rey e ao que asistiron o presidente da entidade convocante, Jorge Arán; o presidente do Club Náutico e Deportivo de Riveira, José Luís Torres Colomer; o concelleiro de Deportes do Concello de Porto do Son, Juan Pouso; así como o vicepresidente da Real Federación Galega de Vela, Pedro Piñeiro; o Xefe de Salvamento Marítimo de #Finisterre, Manuel Capeáns; o Patrón Maior da Confraría de Pescadores San Andrés de Portosín, Isaac Gaciño; e os directivos de Portosín, o Comodoro Fernando González e o Vicecomodoro, José García.
A próxima gran cita coa vela de cruceiro organizada en Portosín será unha nova edición da Mar de #Finisterre – Trofeo Pitusa Sabín, xa no mes de agosto, os días 21 e 22 de agosto.