O alumnado do CPI de Dodro celebra o peche de curso poñendo na Rede os seus proxectos

A pandemia condicionou todo, mesmo as actividades habituais de peche curso nos nosos centros educativos, polo que foi preciso buscar alternativas nas contornas online. Esta foi a fórmula usada polo alumnado do CPI de Dodro para a celebración da súa tradicional xornada de portas abertas co que celebrar o remate do ano académico.

As e os escolares CPI decidiron elaborar unha páxina web que recollera os proxectos e creacións levados a cabo ao longo de todo o curso e que tiveron como tema principal as emocións. A iniciativa do centro levou por título Persensamos Dodro, co que os rapaces lanzaron un convite integral a “percibir, sentir e pensar” o concello apostando ao mesmo tempo por fórmulas infalíbeis como sustentabilidade, a reivindicación da historia local ou a innovación. Inclúense recursos divulgativos de gran interese, como vídeos sobre a desaparición dos vagalumes, sobre como construír casas máis sustentábeis ou sobre as orixes do Valo de Manselle.