A localidade sonense de Portosín reuniu esta mañá, nas instalacións do Real Club Náutico, a unha ampla
representación das institucións locais e rexionais, para animar e apoiar na súa despedida cara aos JJ. OO. de Tokyo, ao regatista portosinense Iago López Marra.
Ao acto, encabezado polo Alcalde de Porto do Son, Luís Oujo, e o presidente do RCN Portosín, Jorge Arán, asistiron o Secretario Xeral para ou Deporte da Xunta de Galicia, José Ramón Lete; o presidente da Real Federación Galega de Vela, Manuel Villaverde; o Comodoro do Club, Fernando González, que fixo as veces de Mestre de Cerimonias;
os concelleiros Juan Pouso e Manuel Dean, Deportes e Turismo, respectivamente; o Xefe de Salvamento Marítimo de #Finisterre, Manuel Capeáns; o Patrón Maior da Confraría de Pescadores San Andrés de Portosín, Isaac Gaciño; o párroco de Portosín, José Ramón Jorge Mosquera; así como os pais e familiares de López Marra.
“Iago simboliza todo o que é o verdadeiro significado do deporte”, destacaba na súa glosa o Comodoro do Club de Portosín, Fernando González.
“Desde pequeno, cando me subín por primeira vez a un barco, souben que isto era ao que me quería dedicar o resto da miña vida”, afirmaba na súa intervención o regatista olímpico Iago López Marra.
“Eu non creo na sorte”, comentaba o presidente federativo Manuel Villaverde. “A estes sitios (en referencia aos JJ. OO.) non se chega con sorte, así que a por todas Iago. Trae ese ouro para Galicia, que boa falta fainos”, terminaba dicindo.
“Moita xente pequena, facendo cousas pequenas, en pequenos lugares, poden cambiar o mundo” (en referencia ao escritor uruguaio, Eduardo Galeano). “E ti, fixéchelo Iago. Ter en Portosín un regatista olímpico, é todo un orgullo”, comentaba o Alcalde de Porto do Son, Luís Oujo.
Pola súa banda e pechando o acto homenaxe, José Ramón Lete, Secretario Xeral para ou Deporte dicía que “este é un acto debido, un acto obrigado, porque che queremos agradecer Iago todo o traballo e todo o esforzo que realizaches, representando ademais a un club como o Real Club Náutico Portosín, que tanto che emociona”.
A pancarta descuberta hoxe no club lucirá dentro duns días na fachada do Concello de Porto do Son, un xesto solidario e de ánimo cara a un deportista local que navega cara a Tokyo en busca do seu soño dourado.
