Entregados no IES da Pobra os premios do concurso #ApobraconXela

O Concello da Pobra repartiu este venres 5 de xuño os cinco lotes de premios dunha das actividades estrela do programa local de celebracións arredor das Letras Galegas: a actividade #ApobraconXela, lanzada na rede social Instagram para homenaxear á poeta Xela Arias e á nosa cultura. As encargadas de achegar os agasallos ás e aos participantes (alumnas e alumnos do IES da Pobra) foron a concelleira de Cultura, Patricia Lojo (PSdeG-PSOE) e a técnica municipal desta área, Fita Sanisidro.

Cada unha das recompensas componse duns auriculares sen fíos, unha batería recargábel para dispositivos electrónicos e un caderno conmemorativo.

Concluíu así a distribución de agasallos entre a rapazada participante nas actividades dirixidas ós centros educativos do municipio polas Letras Galegas e impulsadas dende a Concellaría da Cultura da Pobra do Caramiñal.