En Dodro, o Concello aposta polos hábitos saudábeis no verán con dous campamentos deportivos para a rapazada

O Concello de Dodro anuncia dúas actividades para que as rapazas e rapaces do termo municipal as subliñen no calendario: dúas actividades de lecer e conciliación para que a formación e os adestramentos físicos non decaian na época estival.

Por unha banda trátase do Campamento de Deportes Alternativos, que se celebra (para nenas e nenos de entre 7 e 15 anos) os días 23, 25, 28, 29 e 30 de xuño, e 1 e 2 de xullo, en horario de 11 a 13 horas. Esta actividade vén da man do Concello e a Deputación da Coruña.

Pola outra, o Concello tamén convocou un Campamento Deportivo de Verán, con deportes tradicionais e (tamén) galegos e todo tipo de actividades saudábeis ao aire libre. Esta actividade vai dirixida a nenas e nenos de entre 7 e 15 anos. Desenvolverase os días 5, 6, 7, 8, 9, 12, 13, 14, 15 e 16 de xullo. Organiza o Concello e a Deputación.

Para máis información (e inscricións) cómpre chamar ao teléfono 981 802 532 ou ben escribir un correo a deportes@dodro.gal. As prazas son limitadas atendendo á normativa relacionada coa COVID-19.