O Concello de Dodro redactará un proxecto técnico para a construción dunha senda peonil que conectará a zona de Manselle coa estrada autonómica AC-205 e o enlace á autovía AG-11. O proxecto que presenta a Deputación da Coruña, consiste nun camiño de aproximadamente dous quilómetros de lonxitude.
O alcalde de Dodro, Xabier Castro sinalou a “importancia para o municipio desta infraestrutura, que mellorará a seguridade das veciñas e veciños dos núcleos de Tallós, Eiro, Tarrío, A Igrexa e Manselle nos seus desprazamentos a pé, para os que actualmente carecen dunha zona de paso seguro, nunha estrada provincial que apenas conta con cinco metros de ancho”. Concretamente, a senda permitirá un acceso seguro para os peóns á Casa do Concello, ao local social, ó campo de fútbol de Chenlo ou á igrexa de San Xulián de Laíño. A maiores, o alcalde de Dodro pediu tamén o apoio da Deputación para un proxecto de sinalización de vías nas que se dea prioridade ao uso ciclista, nas que se limitaría a velocidade dos vehículos de motor e se advertiría da necesidade de gardar as distancias necesarias para efectuar os adiantamentos en condicións de seguridade.
O presidente da Deputación, Valentín González Formoso interesouse tamén polos proxectos que está a desenvolver o goberno municipal de Xabier Castro Tourís para fixar e atraer nova poboación no rural. Entre eles destacan iniciativas como a que desenvolven en colaboración coa ONG Provivienda para ofrecer vivenda a prezo accesible e oportunidades laborais ás familias que desexen fixar a súa residencia en Dodro ou un proxecto que pretende atraer ás familias das áreas urbanas de Galicia ou España que estean interesadas en trasladar o seu lugar de residencia ao rural.