Boiro, en nivel medio-baixo de restricións

O Concello de Boiro celebrou na mañá deste 14 de xuño unha nova sesión da Comisión de Seguimento da Evolución da COVID-19, que se realiza de xeito semanal para coñecer os índices da pandemia no municipio e determinar as accións e medidas que se van seguir para o control da situación epidemiolóxica. Na sesión lembrouse que “segundo os datos da Consellería de Sanidade” o numero de novos positivos no municipio segue en descenso, polo que o municipio se atopa no nivel medio-baixo de restrición.

Tamén se fixo saber que o seguimento da necesidades da poboación ante a crise pandémica segue a realizarse dende o departamento de Servizos Sociais, que xunto con Protección Civil pon o foco en axudar ás persoas contaxiadas na recollida de lixo ou na entrega de alimentados e outros alimentos de primeira necesidade. A Policía Local tramitou unha nova denuncia na última semana polo uso indebido de máscara de protección.