A Asociación Amicos, con sedes en Boiro e Ribeira (dende onde desenvolve multiples frontes para lograr a plena inclusión de persoas con diversidade funcional e cognitiva) súmase a celebración do Día Mundial do Orgullo LGTBI, que se celebra este 28 de xuño e ao longo de toda a semana.
No Centro de Atención Integral de Boiro usuarios e persoal centraron as celebracións a carón dunha das paredes das instalacións, onde se vinilou a bandeira do arco iris coa axuda dos técnicos e usuarios da asociación.
Baixo a etiqueta #orgullo os traballadores e todos os membros do centro sumáronse a sacar fotos no novo muro da diversidade.
Durante estas semanas as e os integrantes da asociación tamén desenvolveron actividades formativas e de sensibilización. “Nós máis que ninguén sabemos o que é ser un colectivo minoritario e moitas veces rexeitado na sociedade, por iso nos unimos a reivindicación dos dereitos das persoas homosexuais”, sinalaron na súa proclama.
