Os pilotos Pepe Barrio e Pilar Sarmiento ratifican en Outes o seu gran momento, facéndose coa segunda
proba do Trofeo Fibralar que esta mañá acolleu O Freixo. Profetas na súa terra, os noieses lideran o Campionato Galego Inclusivo de Motonáutica, con excepcional dominio tanto no slalom do trazado como na pericia nas probas de destreza, como son o fondeo, salvamento, atracada e elaboración de nós mariñeiros.
De brillante tamén se pode cualificar a actuación dos vigueses José Luís Álvarez e Oswaldo Davila, que foron de menos a máis e nesta cita coruñesa coáronse no podio ata o segundo banzo do caixón, seguidos no bronce polos tamén vigueses Santomé e Piñeiro.
Boa xornada de competición a vivida hoxe no Freixo, cunha excelente meteoroloxía que facilitou o bo desenvolvemento da proba. O colofón final chegaba coa entrega de premios presidida polo concelleiro
de deportes do Concello de Outes, Daniel Rodríguez e que se celebraba nas instalacións do Centro Náutico Municipal.
