En Ribeira adxudicado o pavimentado da estrada de Axeitos, en Oleiros

O Concello de Ribeira adxudicou con carácter provisional o pavimentado da estrada de Axeitos, situada na parroquia de Oleiros. A empresa que obtivo a mellor clasificación entre as dez que se presentaron resultou ser Construcciones Ponciano Nieto, S.L, cunha oferta de 75.868 euros, IVE incluído.

A intención desta obra reside en estender unha nova capa de aglomerado asfáltico na vía en cuestión, que a día de hoxe rexistra algunhas fochas e zonas disgregadas. A intervención inclúe a pavimentación dos sobreanchos.

A actuación está financiada con cargo ao Plan Provincial de cooperación ás Obras e Servizos de competencia Municipal (POS+ Adicional 1/2018).

O prazo de execución son dous meses.