Continúan os traballos de arrefriado e control dos rescoldos na conserveira JEALSA

Jealsa mantén os seus “compromisos con clientes e consumidores” a pesar dun incendio que en 24 horas calcinou máis de 10.000 m2.

Os servizos de extinción continúan na tarde deste domingo cos traballos de arrefriado e control dos rescoldos que quedan activos do incendio declarado este sábado nas instalacións da conserveira Jealsa, en Boiro (A Coruña), e que segue controlado.

O 112 Galicia informa ás 19,00 do domingo, que as primeiras valoracións dos técnicos apuntan a máis de 10.000 metros cadrados arrasados polas chamas nesta fábrica localizada na zona de Bodión. Principalmente, o lume calcinou a área de conxelados –onde se declarou o incendio–, ademais da de cocción e a de procesado.

O lume levantou unha gran nube de fume visible desde puntos de toda a ría de Arousa e que nun primeiro momento obrigou a desaloxar a 60 veciños da contorna por precaución, aínda que sobre as 21,00 do sábado puideron volver ás súas vivendas en bo estado de saúde.

A magnitude do lume na conserveira obrigou á Axencia Galega de Emerxencias ( Axega) a activar o nivel 1 do Plan Territorial de Emerxencias de Galicia ( Platerga), aínda que ao mediodía deste domingo xa quedou sen efecto.

Con todo, aínda continúan os labores no punto co apoio do Grupo de Apoio Loxístico ( GALI) da Axega, que puxo ao dispor dos servizos de extinción 12.000 litros de auga.

Ademais, durante a mañá deste domingo unha dotación de drons sobrevoou o perímetro industrial afectado para visibilizar os danos provocados polo lume. De feito, o uso de cámaras termográficas axudou a identificar as partes máis comprometidas da estrutura e a centrar a atención nos focos aínda activos, destaca o 112.

OPERATIVO
O operativo, posto en marcha sobre as 14,30 horas do sábado –cando se recibiron as primeiras chamadas de particulares para alertar do incendio–, contou coa intervención dos bombeiros de Boiro, Ribeira, Ribadumia, Santiago e Arzúa.

Tamén participaron os membros do GES de Noia, Sanxenxo e Muros, os efectivos de Protección Civil de Boiro, Ribeira, A Pobra do Caramiñal, Noia e Cambados, e equipos de Salvamento Marítimo e Gardacostas Galicia.

Así mesmo, para prestar apoio a estes equipos, o 112 pasou o aviso ao Servizo Provincial de Incendios, técnicos da empresa subministradora de enerxía da zona, axentes da Policía Local, da Garda Civil e as autoridades ambientais da Xunta. Igualmente, solicitouse por precaución a presenza dos servizos sanitarios, aínda que non houbo que lamentar danos persoais.

Por parte das autoridades, nas máis de 24 horas durante as que se estenderon os labores acudiron á zona da conserveira o vicepresidente primeiro da Xunta, Alfonso Rueda; a subdelegada do Goberno na Coruña, Pilar López-Rioboo; o alcalde de Boiro, José Ramón Romero; e o secretario xeral do PSdeG, Gonzalo Caballero, entre outros.

Pola súa banda, a dirección de Jealsa emitiu un comunicado este domingo no que garante que “coa axuda de todos” continuará cos seus “compromisos con clientes e consumidores”.

Jealsa aproveita para expresar o seu agradecemento a todas as autoridades que lle brindaron o seu apoio ao poñer a disposición os “efectivos necesarios” para que o lume fose “sufocado de forma áxil e eficaz”.

Ase mesmo a Xunta desactivou este domingo o Plan Territorial de Emerxencias de Galicia ( Platerga) polo incendio que desde a tarde deste sábado afecta as instalacións da conserveira Jealsa en Boiro (A Coruña). Aínda que o lume segue controlado, os servizos de extinción continúan co labor de arrefriado do perímetro e de vixilancia sobre os focos que permanecen activos.