Ante os feitos acontecidos co desaloxo de 25 mozos nunha festa privada en Ribeira, o BNG esixe que se depuren todas as responsabilidades e se proceda ao cesamento dunha concelleira popular copropietaria do local. Os nacionalistas piden o cese da fronte das súas funcións e responsabilidades no goberno municipal do concello.
Tal como informamos en O Barbanza unha patrulla da Policía Local de Ribeira, coa colaboración dos axentes da comisaría, procederon a identificar e, posteriormente, desaloxar a 25 mozos, a maioría tiñan entre 15 e 17 anos -tamén había unha nena de 13 e un mozo que roldaba a vintena-, que participaban nunha festa privada nun local hostaleiro situado na zona da movida de Bandourrío
Tendo en conta a situación epidemiolóxica do Concello de Ribeira, a piques de acadar o nivel extremo de restricións, co feche perimetral e o cese da actividade hostaleira, desde o BNG amosa a máxima repulsa ante unha conduta que califican de irresponsábel e insolidaria para a veciñanza e os negocios da localidade.
O voceiro do BNG, Vázquez Cobas indica que os representantes públicos deben mostrar actitudes exemplares, tanto na súa vida pública como privada, especialmente naquelas persoas que asumen responsabilidades de goberno no ámbito social.
