Galicia sitúase entre as autonomías máis galardoadas pola Asociación de Educación Ambiental e do Consumidor (ADEAC), cun global de 155 distintivos entre areais, portos deportivos, sendeiros azuis e centros azuis.
Desta forma, con 111 bandeiras para as súas praias, catro máis que o ano anterior, a Comunidade acapara preto do 20% das outorgadas en toda España. En total, hai 34 municipios premiados, dos cales 12 son da provincia de Pontevedra, 14 da Coruña e 8 de Lugo. Salienta o feito de que o areal do Lago das Pontes reciba por primeira vez este galardón.
No referente ás bandeiras para portos deportivos, son un total de 11 (6 en Pontevedra, 6 na Coruña e 1 en Lugo); os centros azuis galardoados son 13 (6 en Pontevedra, 4 na Coruña e 3 en Lugo); e os 20 sendeiros distribúense entre os 9 de Pontevedra, os 6 da Coruña e os 5 de Lugo.
O municipio de Sanxenxo volve repetir como concello con máis bandeiras azuis nas súas praias, obtendo 17. Mentres, en Pontevedra, destacan a cidade de Vigo, que suma 10 areais e unha rede de sendeiros; Cangas do Morrazo (7 praias, un porto e un sendeiro); Marín (5 praias, dous centros e unha rede de sendeiros) e Baiona (6 praias e un porto).
Na mesma liña, na provincia da Coruña, destaca Arteixo como o municipio que máis bandeiras azuis obtén para as súas praias (un total de 7), seguido da cidade da Coruña (5 areais, ademais dun porto e un sendeiro) e Oleiros (5 areais e tamén un sendeiro). Polo que respecta á provincia de Lugo, Foz volve ser o concello con máis praias galardoadas, con 5: A Rapadoira, Areoura, As Polas, Llas e Peizás.
En xeral, os criterios esixidos para a obtención de bandeiras azuis en praias e portos están relacionados coa calidade das augas, a seguridade, a dotación de servizos, a accesibilidade, a xestión ambiental e a sustentabilidade dos areais e as dársenas. Ademais, os centros e sendeiros azuis deben fomentar a educación ambiental no litoral, o coñecemento da contorna e as alternativas de ocio. De feito, aqueles municipios que queiran optar a estas distincións deben presentar uns dosiers xustificativos da súa proposta, que inclúan unha memoria de actividade.
Por mor da COVID – 19, cómpre mencionar que moitos concellos costeiros adoptaron solucións tecnolóxicas ou mesmo contrataron persoal de vixilancia para controlar o aforo nas praias durante o verán, reforzando así as medidas de hixiene e limpeza de acordo coas recomendacións das autoridades sanitarias.
