Até 18 de persoas participaron en Rianxo na segunda edición do Curso de Reanimación Cardiopulmonar Básica (RCP) e Desfibrilador Semiautomático (DESA) que organizou en dúas quendas o Servizo de Deportes municipal en colaboración con Protección Civil de Rianxo e instrutores de AGAMFEC (Asociación Galega de Médicos de Familia).
Dado o éxito da iniciativa, Deportes de Rianxo xa confirmou a celebración vindeira dunha terceira edición, non só polo alto nivel de participación senón tamén pola “propia importancia destas actividades formativas que “son vitais e imprescindíbeis para a veciñanza e para as entidades do noso concello”, informou a dita área municipal.
O obxectivo foi iniciar ás persoas participantes nas metodoloxías básicas de reanimación cardiopulmonar, no soporte vital básico e no manexo do DESA, capacitándoas para atender unha emerxencia nas mellores condicións posíbeis até o intre da chegada dos servizos médicos.
A actividade foi gratuíta e ao remate da mesma expediuse un certificado avalado pola SEMFYC, o consello español de RCP e homologado polo consello europeo de RCP.
